「日常」和csl客服大戰六個月終於完
今篇文章係我親身經歷。早係8月份時我已經覺得寫出嚟一定好juice。無奈個合約就係要等時間到期，所以就算我一早已經買咗新卡，做哂轉台手續都係一定要等到同舊台合約到期個日。早幾日我
今篇文章係我親身經歷。早係8月份時我已經覺得寫出嚟一定好juice。無奈個合約就係要等時間到期，所以就算我一早已經買咗新卡，做哂轉台手續都係一定要等到同舊台合約到期個日。早幾日我終於完全脫離csl，真係可喜可賀！
事源六年前我仲係讀緊書嘅時候，我用緊媽咪幫我出台嘅中移動。其實一直都有啲地方收唔好，例如係隧道同地鐵都好慢。我未試過其他台。有日聽同學傾偈話題竟然係幾百蚊嘅電話費，傾緊邊個台好。當時嘅我覺得佢哋好fancy，而自己因為用平plan又收得差覺得同其他人好似生活係唔同世界。完全插唔到咀。所以我就想試吓用當時比我感覺快同覆蓋地方高嘅csl。一心覺得只要我交咁貴嘅電話費就可以融入fancy同學一樣，變得入流。
結果我就搵左企係條街到sell嘅戶外站。當時有個錯覺個啲街站應該優惠最多。最後我簽左兩年合約，已經唔記得係幾多錢月費，佢話送個煲比我。叫我係屋企等收信就得。（不過事後唔知係佢太遲寄定係老豆收信無同我講，到我發現封信嘅時候已經換唔到煲。但係當時同老豆關係好僵。發現到期換唔到後我都廢事追究。）
俾較貴嘅plan都啱用因為每日都有好多搭車時間，去返學、放學，仲有返part time，通勤時間都要電話上網。價錢反映質素，感覺應該係用緊較快嘅網速。雖然貴但係都覺得幾好。因為搭車時間長，如果唔慳住用一定去唔到一個月。不過就着使都夠用，起碼係網速比之前快。所以佢貴我都有續約。覺得都幫到我。所以都有續兩次。
2020年。開始行唔到要成日入醫院。因為醫生要查明係咩原因而安排我留院觀察。基本上除咗喺自己床到用電話無其他事可以做。所以我當時8gb 一個月plan就好快用哂。而且之後都有幾次入院幾日檢查，想搵出患上腫瘤原因。最長個次係入院成個月。當時因為數據唔夠用，屋企人都買過幾次數據卡俾我上網。當時我沒精打彩去處理任何事，已經被告知以後不能自由行動令我非常洩氣。因為護士知道我不良於行、怕我跌倒原故，禁止我落床。我觀望病床上的天花板，有一幅風景畫，應該係想改善床上病人心情而設。好似話我聽依個係唯一樂趣。我放棄掙扎。只想乖乖等醫生俾我出院。
上一次續約就係依段時間。經過多次被告知入院檢查幾日，我無法預計幾時要係無Wi-Fi 情況下生活。而當時csl offer同一價錢但係50gb一個月。心情非常消極的我無心機去搵另一個電訊商，而且自覺無用嘅我廢事麻煩屋企人次次都買數據卡。就$2**續咗兩年約。但其實之後我都無再好長時間入院。而且我因為行唔到原因多數都係屋企用Wi-Fi 。依家諗起就覺得續約時太唔理性。到意識到太多數據用唔晒後，因為我已經簽咗約嘅關係，唯有硬食到完約。
就係今月4月，csl客服第一次打嚟傾續約。我就開口問：「我覺得現時收費太貴，而且我唔需要咁多。有冇$1**嘅plan比我用？」
客服：「我地無百幾蚊plan喎，你會唔會考慮返個價錢？」
老老實實csl比我感覺係錢就識收，但係服務就比唔到。好似同一集團嘅鏡仔演唱會事件咁。只係想快速賺大量錢而無仔細檢查清楚舞台安全問題。所以就算合約未到期，我已經知用唔到咁多都廢事問可唔可以轉俾少啲月費嘅plan。直接等完約算。我知道自己用唔到咁多，就直接了當講我想要咩。已經比咗機會佢，大家deal唔到就無謂勉強。
我：「咁唔使啦。合約到期我可能號碼都唔要。」
客服：「小姐你再考慮下，你個號碼咁靚。」
我：「你都幾識講嘢喎。咁你有無百幾蚊plan？」
客服：「你可以去我哋網頁睇，或者你再考慮下個價錢？」
我已經唔想續約，仲叫我自己搵？？？？
我：「咁唔使啦。可唔可以幫我睇下幾時到期？」
客服：「查幾時到期要你身份認證喎。」
我：「好啊我依家做。」
客服：「要身份認證喎。不如你再考慮一下啦。你號碼咁靚。」
我：「係咪我唔續約就唔可以幫我睇幾時到期？」
最怕就係死纏爛打又扮聽唔明。
我講咗我嘅期望月費要求。佢無，我咪唔要，又講埋啲無謂嘢，叫佢幫我睇幾時到期又唔爽手。之後我講完，佢就幫我查。咁終於完咗第一次交涉。因為我明確拒絕過。亦都令我堅決唔再續約。
之後我都醒水唔再聽csl電話。直到有一次我見到話唔續約會無咗現時優惠。咁我就諗佢意思係咪我無用佢服務都照收我月費？而且仲比現時月費貴？有見及此我就打去問客服，問個明白。我都直接講明我唔再續，見到網頁上話係要同佢講聲話唔續，就問客服我唔續約應該點做。
結果依個客服一開始都有sale我。同我提議有咩月費plan。我就話唔使啦。佢問返我點解。我就話你都見到我數據用剩好多，應該唔需要你哋嘅服務。之後我再問埋關於轉台嘅手續。佢話我唔使通知舊台，有新台之後，合約到期就自動轉。
對客服而言，如果經佢手成功令客戶續約，客服應該有incentive ，所以佢應該唔會答我關於轉台問題先啱，不過佢都照答我，好感動🥲。估唔到仲有正常嘅客服。
之後幾個月等待到期嘅日子就係最漫長嘅時候。因為見我未續約就三不五時打電話嚟，如果我唔聽仲會留語音口訊。每一次催促，好似都會令我覺得到期轉台會唔會咁順利？佢嘅頻密騷擾程度令我質疑係咪當中有詐？係咪只要等到期就會平安大吉。（當然係）
當中等待到期日之間煩人嘅通話同短訊騷擾我就唔仔細談論。總之佢不時打嚟都會令我不安。到合約到期最後一日佢都sms我要傾續約。真係好煩🤯。
總之依家我終於擺脫舊台騷擾🥲。順帶一提，我用緊sosim $33/50gb一個月。依篇文章都好長又噚氣。寫都寫到唔耐煩。最後比個建議大家：唔好人云亦云。應該跟據自己需要去做決定。
23年一月份同csl故事有更新
「日常」乜又係你呀陳生！同Csl嘅故事竟然仲未完
話說今個月發生太多事，包括確診肺炎，信用卡騙案、睇咗一本作者慕蓉雪村拯救人賣豬仔嘅故事，《中國，少了一味藥。》。又因為一直對鄧小樺對作者張愛玲嘅執着，令我感到好好奇。只係提起對方嘅作品，都和我以前去韓國追姜東昊時。眼中閃閃發光一樣🤩。所以…medium.com
23年二月份再有更新
「日常」The club騙案故事後續｜我和東亞信用卡的故事
今篇應該係我同csl/The club最後最後嘅故事。之前我寫咗兩篇關於我用csl臨完約前半年不停chur我續約，最後成功轉台嘅故事。medium.com
歡迎拍手 ！likecoin！