「日常」一個有原則的電飯煲
有原則又做到嘢，令人尊敬。
話說早幾個月因為屋企電飯煲煲到一舊舊硬飯出來，所以就買咗個新電飯煲。點知個電飯煲容量好細，得1.8L。所以如果我一家四口要煲粥，假設男人要食多啲，細佬同老豆要食兩大碗，我媽同我食一碗，都要六大碗先足夠。依個電飯煲完全唔夠。仲有因為個內籠細，唔夠放一個普通家用大碟，所以係唔可以一邊煲飯、上面蒸肉餅。個飯煲功能對我屋企來講只有煲飯。
但係佢仲有一樣其他電飯煲無嘅功能，就係佢煲個飯係要37分鐘。仲會計埋時，倒數咁顯示俾你。
我唔知其他人屋企個飯煲會唔會要37分鐘咁耐。但屋企舊嗰個係唔使咁耐，都係廿零分鐘左右，同埋容量大好多可以煲粥、蒸肉餅都得。佢係衰在用耐左會黐底所以再煲唔到粥、啲飯有硬塊（飯煲煲到有硬塊，做唔到佢應份做嘅基本要求都應該要換啦。）
換咗新電飯煲幾個月，一直都相安無事，來煲飯佢非常出色，同舊嗰個電飯煲煲出來嘅飯比好食之餘，同外賣食到嘅白飯比都更加軟熟同有咬口。我覺得暫時來講屋企個電飯煲煲嘅飯已經好好食，無對比之下可能體會唔到佢幾好，咪就係白飯，就算煲到識飛天，咪又係要配餸食。依家物質咁豐富嘅社會應該唔會有人要就咁食白飯掛！？
但係有時就係一啲好基本嘅嘢做唔好，就會影響哂全部嘅效果。好似如果有一個咖喱牛腩飯，主角係咖喱牛腩，但係如果食到一舊硬飯，都唔會覺得成個食飯體驗係好咁。由原本100分，可能因為個飯難食變咗60分。
所以就算要等佢37分鐘煲飯，我都覺得唔係大問題。只要佢煲嘅飯好食就得。
但係最近發生咗一件事，令我覺得佢真係好有原則。
事源每逢8點，我媽都會準時煲飯。但當日細佬8點05返到屋企，原本就無預計細佬返屋企食飯，所以無煲佢嘅飯。而電飯煲只係啱啱開始煲飯。我媽就諗住打開，之後再加米落去煮。如果係舊嗰個傻瓜電飯煲，唔係智能，無咁多function就無問題。但係依個飯煲一開咗蓋、再閂返就無咗煲飯個計時功能，即係停止咗煲飯，但係仲有飯煲運作緊嘅聲。結果off咗電源再插返都係無補於事，完全無用。
我哋之後試吓撳上面嘅掣，睇吓可唔可以令飯煲重新開始煲飯計時，慌慌張張之下去搵Google 個說明書睇，有中、英文說明而中文說明係下面，但係一唔小心又自動去返最頂。重複睇咗幾次，最後發現有一個「取消」掣。撳完之後都係無反應。當時已經9點，驚個電飯煲壞咗要整，跟住幾日無飯食之餘。當時都好肚餓，但係我哋完全無辦法。
就係我哋一頭煙之際。突然間個飯煲好似聽到我哋焦急嘅心聲，由顯示時間，自己轉跳到煲飯計時！顯示時間由37分鐘變做47分鐘。但係佢可以煲到飯，我就唔再執着要幾耐先可以食飯。起碼無壞到，而且今日都有飯食先！
之後再睇書明書，原來煲飯有分「delicious」、「regular」、「quick」。分別係47分鐘、37分鐘、27分鐘。可能係我哋亂撳之際，set咗做「delicious」，所以跳咗去47分鐘開始倒數，好彩嘅係飯煲肯自己煲返飯。咁我地聽日都可以有飯食。
起初聽我媽講話一開咗個蓋就無繼續煲飯，就覺得「嘩！咁有原則嘅！？」但係諗落依個飯煲一直都好有性格。因為我哋屋企有4個人，容量細嘅佢對我哋來講可以用嘅功能就只有煲飯。煲到軟熟、有咬口嘅飯就係佢唯一嘅功能。
我好尊敬佢㗎，因為佢煲嘅飯係好食。而且只係專注做好一件事：煲飯。經過今次之後以後都唔會煲緊飯去開個飯煲蓋。
今篇完！歡迎請我喝杯咖啡、訂閱、likecoin!
我都啱啱買咗個 Panasonic 飯煲，0.27L，180 蚊，好好用
我有你呢個飯煲, 今日到我有呢個問題, 煲飯只顯示時間冇顯示倒數, 其他功能冇問題, 我頭都大埋,而家企左係度